Laugardagur

Krakkarnir eru búnir að standa sig rosalega vel í dag.

Allir náðu að sofa vel þrátt fyrir að vindurinn hafi náð 29 m/s í hviðum í nótt! Undir morgun fór að lægja og morguninn hófst með kröftum morgunverði, hafragraut, súrmjólk, ávöxtum og brauðmeti. Síðan var krökkunum skipt upp í 10 manna blandaða hópa fyrir stöðvaræfingar.

Æfingar fóru fram viðsvegar um Bláfjöll og verða veitt verðlaun á morgun fyrir þann hóp sem náði bestum árangri. Á stöðvunum var m.a. bíll dreginn, klifrað var upp á skúr, yfir sandhól, hlaupið um brekkurnar með stangabúnt o.fl. Þrátt fyrir að rignt hafi á köflum og vindur blásið kvartaði enginn. Siggi þjálfari stjórnaði æfingunum af röggsemi með aðstoð foreldra í skíðadeild Breiðabliks. Er það aðdáunarvert hvað krakkarnir stóðu sig vel. Eftir þetta gafst smá hvíld áður en hollur hádegisverður var borinn fram, fiskur, salat og kartöflur.

Eftir hádegismat var haldið í rútum í Fífuna, íþróttasvæði Breiðabliks. Þar fór fram þrekpróf sem fólst í 3 km hlaupi, langstökki og kassahoppi. Eftir það var borðað og svo haldið í óvissuferð sem Eskimos ævintýraferðir sáu um (www.eskimos.is). Tekið var á móti krökkunum í Laugardalnum þar sem farið var í GPS ratleik og krökkunum skipt upp í nokkra hópa. Hverjum hóp voru kynnt undirstöðuatriðin í meðferð GPS tækja og hvernig tækin virka. Liðstjóri hvers liðs fékk svo gögn um leikinn og keppnin hófst. Á hverri stöð þurfti að leysa saman þrautir og verkefni áður en ákvörðunarstað var náð.

Í kvöld var svo grillað í Bláfjöllum og búast má við að krakkarnir sofni vel eftir fjörugan dag!